កូរ៉េ៖ ស្ថានទូតកម្ពុជាប្រចាំប្រទេសកូរ៉េ ព្រួយបារម្ភពីមរណភាពពលរដ្ឋខ្មែរ ដែលធ្វើការនៅសាធារណរដ្ឋកូរ៉េ និងអំពាវនាវឱ្យយកចិត្តទុកដាក់តាមដាន និងថែរក្សាសុខភាពឱ្យបានល្អ ខណៈអាកាសធាតុមានការប្រែប្រួល។

ឯកអគ្គរាជទូតកម្ពុជាប្រចាំប្រទេសកូរ៉េ លោកស្រី ជ្រឹង បុទុមរង្សី នៅថ្ងៃទី២៤ ខែមីនា ឆ្នាំ២០២៣ បានសរសេរលើគណនីរបស់ខ្លួន ដោយលើកឡើងថា មួយរយៈពេលថ្មីៗនេះ ទូតបានទទួលដំណឹងមរណភាពរបស់ពលរដ្ឋខ្មែរដែលរស់នៅ និងធ្វើការនៅសាធារណរដ្ឋកូរ៉េនេះដោយសារបញ្ហាសុខភាព ឬបញ្ហាផ្លូវចិត្ត ខណៈបច្ចុប្បន្ននេះអាកាសធាតុមានការប្រែប្រួលច្រើន ហើយបញ្ហាស្មុគស្មាញក៏អាចកើតមានដែរ។

ឯកអគ្គរាជទូតរូបនេះ អំពាវនាវឱ្យយកចិត្តទុកដាក់ថែរក្សាសុខភាពទាំងផ្លូវកាយ និងផ្លូវចិត្ត ប្រសិនបើសង្កេតឃើញថាមានអាការមិនសូវស្រួល សូមទៅពិភាក្សាជាមួយគ្រូពេទ្យ និងតាមដានសុខភាពអោយបានដិតដល់។

ក្នុងអំឡុងអាកាសធាតុនៅកូរ៉េមានការប្រែប្រួល ស្ថានទូតកម្ពុជាប្រចាំនៅកូរ៉េនឹងសហការជាមួយក្រុមគ្រូពេទ្យស្ម័គ្រចិត្តកូរ៉េ ដើម្បីធ្វើយុទ្ធនាការចុះពិនិត្យសុខភាពពលរដ្ឋនិងពលករខ្មែរ នៅតាមតំបន់នានាក្នុងពេលឆាប់ៗខាងមុខនេះ។ ម្យ៉ាងទៀតទៀតប្រសិនបើចង់ពិគ្រោះយោបល់ ក៏អាចទាក់ទងមកកាន់លេខស្ថានទូត 02-3785-1041 ផងដែរ៕